ಚೊಕ್ರಮುಡಿಯ ಚಾರಣ

ಚೊಕ್ರಮುಡಿಯ ಅರಳಿ ನಿಂತ ನೀಲಕುರಿಂಜಿಯ ಶೃಂಗಾರ
ಪ್ರಕೃತಿಯು ನೀಲಕಂಠನ ಮುಡಿಗೆ ಮಾಡಿದ ಅಲಂಕಾರ
ಕಣ್ಣಳತೆಗೂ ನಿಲುಕದಂತೆ ವಿಸ್ತರಿಸಿಹುದು ನೀಲಸಾಗರ

ಅದ್ಭುತ, ವಿಸ್ಮಯ, ಪ್ರಕೃತಿಯು ಅಚ್ಚರಿಗಳ ಆಗರ

ಹನ್ನೆರಡು ಸಂವತ್ಸರಗಳ ಅಂತರದಿ ಕಾಣುವ ಈ ಶೃಂಗಾರ
ಕೆಲವು ಮಾಸಗಳ ಕಾಲ ಮಾತ್ರ ತೋರುವುದು ತನ್ನ ವೈಯ್ಯಾರ
ನೋಡಲು ಸೇರಿಹುದು ಊಹೆಗೂ ನಿಲುಕದ ಜನಸಾಗರ 

ತಮ್ಮ ಜೀವನಾನುಭವಕ್ಕೆ ಸೇರಿಸಲು ಹೊಸ ವಿಚಾರ

ನೀಲಾಕಾಶದ ಅಂಚಿನ ಗಿರಿ ಶಿಖರ 
ಮೇಘಾವೃತವಾದ ಗಿರಿ ಕಂದರ
ಚಹಾ ತೋಟಗಳ ಹಸಿರ ಚಿತ್ತಾರ

ಕಣ್ಣೆರಡು ಸಾಲದು ನೋಡಲು ಈ ಸೌಂದರ್ಯದ ಸಾಗರ

ಒಂಬತ್ತು ಗುಡ್ಡ

ಒಂಬತ್ತು ಗುಡ್ಡದ ಹತ್ತಿರದ ತಾಣ

ಖಾಸಗೀ ಎಸ್ಟೇಟು ತೋಟಗಳ ಕಣ

ಪರಿಚಯದವರಿಗೆ ಮಾತ್ರ ಸಿಗುವ ಆಹ್ವಾನ

ಮೊಬೈಲ್ ಜಾಲ ಇಲ್ಲದ ಕಾರಣ

ಸ್ತಬ್ಧ ಇಲ್ಲಿ ಅವುಗಳ ರಿಂಗಣ

ಪಸರಿಸಿದೆ ಶಾಂತತೆಯ ವಾತಾವರಣ

ಜುಯ್ಯ ಎನ್ನುವ ಕೀಟಗಳ ಮೊರೆತ

ಜಲಪಾತದ ನೀರಿನ ಭೋರ್ಗರೆತ

ಝರಿಗಳ ಜುಳುಜುಳು ನಿನಾದ ಕೇಳಲು ಬಲುಹಿತ

ಇದು ಹತ್ತಾರು ವನ್ಯಜೀವಿಗಳ ವಾಸಸ್ಥಾನ

ಸಾಹಸಮಯ, ಇಲ್ಲಿನ ಸ್ಥಳೀಯರ ಜೀವನ

ನಡೆಸುವರವರು ಕಾಡಿನೊಂದಿಗೆ ಸಹಜೀವನ

ಅಸಾಧ್ಯವಾದರೂ ಒಂಬತ್ತು ಗುಡ್ಡಗಳ ಆರೋಹಣ

ದೊರೆಯಿತು ಪ್ರಕೃತಿಯ ಸೂಕ್ಷ್ಮಾ ವಲೋಕನ

ಮರೆಯಲಾರದ ಸ್ಥಳೀಯರ ಅಕ್ಕರೆಯ ಔತಣ