ಹೋಳಿ ಹಬ್ಬ

ಇರಲಿ ಯಾವುದೇ ಪೋಷಾಕು

ಧರಿಸು ಬಣ್ಣಗಳ ಮುಸುಕು

ಸಿಟ್ಟು ಸೆಡೆಗಳ ಬಿಸಾಕು

ಬಂಧುಮಿತ್ರರಿಗೆ ಬಣ್ಣವ ಹಾಕು

ದುಃಖ ದುಮ್ಮಾನಗಳನು ನೂಕು

ಸಿಹಿತಿನಿಸುಗಳ ಮೆಲುಕು ಹಾಕು

ಇದಕ್ಕೆಲ್ಲ  ಹೋಳಿಹಬ್ಬವೇ ಬೇಕು

ಹುಣ್ಣಿಮೆ ಚಂದಿರ ಬಣ್ಣವ ತಂದನು 

ಹೋಳಿಯ ಆಟವ ಆಡಿಸಲು

ನಮ್ಮನ್ನು ಮುಳುಗಿಸಿ ಬಣ್ಣದಲಿ

ತಾ ನಗುತಿಹನು ಶ್ವೇತ ವರ್ಣದಲಿ

ಚೊಕ್ರಮುಡಿಯ ಚಾರಣ

ಚೊಕ್ರಮುಡಿಯ ಅರಳಿ ನಿಂತ ನೀಲಕುರಿಂಜಿಯ ಶೃಂಗಾರ
ಪ್ರಕೃತಿಯು ನೀಲಕಂಠನ ಮುಡಿಗೆ ಮಾಡಿದ ಅಲಂಕಾರ
ಕಣ್ಣಳತೆಗೂ ನಿಲುಕದಂತೆ ವಿಸ್ತರಿಸಿಹುದು ನೀಲಸಾಗರ

ಅದ್ಭುತ, ವಿಸ್ಮಯ, ಪ್ರಕೃತಿಯು ಅಚ್ಚರಿಗಳ ಆಗರ

ಹನ್ನೆರಡು ಸಂವತ್ಸರಗಳ ಅಂತರದಿ ಕಾಣುವ ಈ ಶೃಂಗಾರ
ಕೆಲವು ಮಾಸಗಳ ಕಾಲ ಮಾತ್ರ ತೋರುವುದು ತನ್ನ ವೈಯ್ಯಾರ
ನೋಡಲು ಸೇರಿಹುದು ಊಹೆಗೂ ನಿಲುಕದ ಜನಸಾಗರ 

ತಮ್ಮ ಜೀವನಾನುಭವಕ್ಕೆ ಸೇರಿಸಲು ಹೊಸ ವಿಚಾರ

ನೀಲಾಕಾಶದ ಅಂಚಿನ ಗಿರಿ ಶಿಖರ 
ಮೇಘಾವೃತವಾದ ಗಿರಿ ಕಂದರ
ಚಹಾ ತೋಟಗಳ ಹಸಿರ ಚಿತ್ತಾರ

ಕಣ್ಣೆರಡು ಸಾಲದು ನೋಡಲು ಈ ಸೌಂದರ್ಯದ ಸಾಗರ